Skála Ítróttarfelag hevur sett Eliesar Olsen í starv sum høvuðusungdómsvenjari fyri kappingarárið 2021.
Eliesar er 31 ár, er uppvaksin á Skála og búsitandi á Eiði saman við konu og børnum. Hann starvast til dagligt sum sølumaður hjá Nema.
Í felagnum er Eliesar bæði kendur sum leikari og venjari. Seinnu árini hevur Eliesar mest verið virkin í EB/Streymi og seinasta kappingarárið hjá NSÍ.
Ein framsøkin arbeiðsætlan fyri ungdómsarbeiðið er gjørd, og kemur Eliesar saman við felagnum og hinum venjarunum í felagnum at virka fyri, at venjingarkarmarnir verða fult gagnnýttir í ungdómsarbeiðinum. Herundir at fitnessrúm, ítróttarhøll og onnur høli í høllini verða nýtt optimalt, umframt at skipað verður fyri venjingum á smærru vøllunum kring um í nærumhvørvinum.
Eisini eru ætlanir um at betra og víðka venjingartilboðini til allar árgangir í barna- og ungdómsdeildunum, umframt at venjingarætlanir og menningarætlanir verða mentar og dagførdar.
Vit eru glað fyri at bjóða Eliesar væl afturkomnan til Skálar, og síggja fram til gott samstarv í komandi kappingarári.