Fyrr í vikuni leikti Gentur 18 felagsliðið hjá Ebstreymi/Skála seg í steypafinaluna, sum verður komandi fríggjakvøld ímóti B36.
Í kvøld leiktu Gentur 15 hjá Skála seg í steypafinaluna á Tórsvølli ímóti HB.
Í eini sera spennandi hálvfinalu í Serpigerði vann Skála 3-1 á Víkingi eftir longda leiktíð. Skála var betri leikandi liðið allan dystin við flest atsøknum, men tað var Víkingur sum fekk fyrsta málið burtur úr ongum miðskeiðis í fyrra hálvleiki, eftir ivasamt verjuavrik frá okkara síðu.
Skála var omaná í seinna hálvleiki og skaptu nógvar møguleikar, men vit skuldu heilt fram til 10 min. undan dystarloki áðrenn vit javna eftir diagonalbólt í aftara øki, har Sólja setur inn. Skála hevði fleiri stórar møguleikar at avgera, men inn fer bólturin ikki og longd leiktíð.
Skála tyktist hava meira orku í longdu leiktíðini, men ikki fyrr enn í seinnu hálvu av longdu leiktíðini avgera vit. Sólja er enn einaferð ísakøld eftir at hon verður stungin avstað í vinstru og løtu seinni avgerð Jakubina tá hon við skotfintu kemur inn til høgru í brotsteignum og leggur bóltin í handara síðunet.
Tað hendi ikki stórvegis aftrat har Skálagentur mest koyrdu bóltin runt og stórur fagnaður tá dómarin bríkslar av.
FM vinnarnir og favorittarnir HB bíða á Tórsvølli, men er tað nakað lið sum kann geva teimum mótstøðu í ár, so er tað júst Skála. Tær vístu í kvøld stóran innsats og vinnaravilja at koma afturíaftur og hetta verður brúk fyri leygardagin.
Tveir av leikarunum á G15, Andrea og Anna Katrina, hava leikt við Gentum 18 í ár, so hjá teimum báðum dragar tað seg um tvær finalur leiktar við 16 tíma millumrúmi.
Við vón um at fleiri skálafjepparar leggja leiðina á Tórsvøll bæði fríggjakvøldið og leygardagin.
KOYR Á SKÁLA !!!